Advertisements

Paduarsana

Berbagi tentang: Hindu, Bali dan Budayanya.

Daily Archives: September 17, 2012

Dewi Saraswati


Om Brahma Putri Mahadéwi
Brahma ya Brahmawandani
Saraswati Sayojanam
Prajanaya Saraswati
Om saraswati ya namah swaha

Sapunika mantra Puja Saraswati, alit-alité saking TK, SD, kantos SMA miwah mahasiswa sinah sampun lancar nguncarang mantram inucap ri kala rerahinan odalan Ida Sang Hyang Aji Saraswati Nemonin rahina Saniscara Umanis Watugunung.

Ri tatkala Ida Sang Hyang Widhi Wasa nedunang mapaica kaweruhan miwah kawicaksanaan Ida kapralambangang sakadi Déwi Saraswati sané listu ayu matangan pat-pat. Soang-soang tangan magegamelan luire kropak lontar, wina utawi rebab, miwah sekar tunjung. Artosipun kropak lontar wantah pralambang kaweruhan miwah kawicaksanan . Genitri mapralambang wantah kaweruhan miwah kawicaksanan inucap tan telas-telas pacang kapaurukin. Wina utawi rebab pralambang wantah kaweruhan miwah kawicaksanaan inucap prasida ngawetuang kalengutan lelanguan imen-imen wali sané ngulangunin.sekar tunjung inucap wantah pralambang kesucian, yadiastun mentik ring toyané tan prasida basah olih toya. Pralambang Ida Sang Hyang Aji Saraswati mawujud Déwi Saraswati sakadi kabah-bah ring ajeng, taler kapitegepin malih antuk angsa miwah merak. Angsa pralambang kawicaksanaan, merak pralambang kawibawaan.

Déwi Saraswati sajeroning kaagungan sakadi ring ajeng mapaica kaweruhan miwah kawicaksanaan majeng ring manusa pada, taler kaagungan turmaning kasembah olih makudang-kudang sekta. Déwi Saraswati sajeroning kasusastraan Wéda (I.B Swamba.WHD.526.2010) mungguhang déwi saraswati pinaka Déwi kawicaksanaan miwah Déwi kaweruhan sané kasungkemin antuk para sisia ring paguruan. Ring jaman Wéda taler Hyang Saraswati pinaka Déwi béji utawi tukad sané micayang toya membah selantang rina. Nanging langkung kasontrah pinaka Déwi kawicaksanaan miwah kaweruhan. Ring Reg Wéda wénten ngungguhang Codayitri sunrtanam cetaniti sumatinan yajnam dadhe saraswati. Ring sajeroning Asvalayana Grhyasutra Déwi Saraswati kasembah miwah kapuja turmaning katunasin mangdané ngicep kaincepan (kacerdasan) ring para raré sané wawu kaembasang. Taler Déwi Saraswati katunasin mangdané prasida nincapang kaweruhan miwah kawicaksanaan olih para bakta sané nyinggihang anggan Ida.

Ring lontar Ramayana wénten ngungguhang Ida Sang Hyang Aji Saraswati pinaka Déwi Wak utawi Déwi Baos miwah ujaran. Ring Mahabrata miwah ring Purana Déwi Saraswati pinaka lidah Hyang Wisnu. Sané utama malih ring sajeroning Santi Parwa Déwi Saraswati kabaos Ibu saking Wéda. Rsi Wiyasa prangipta maha brata ring purwakaning atur nunas lugra ring Hyang Narayanan miwah Hyang Aji Saraswati sadurung ngawitin nyurat Mahabrata. Narayam Namaskrtya Naram Caiva Narottaman/Dévim Sarasvatim Vyasam Tatojayam Udirarayet (mahabrata, 1.1.1.).

Sajeroning lontar Satapatha Brahmana ngungguhang Déwi Saraswati pinaka tabib (balian) ring jaman Wéda. Taler ring Reg Wéda wénten ngunggahang Dwei sareng-sareng para Aswin sampun prasida tambanin Ida Hyang Indra. Taler indik inucap mungguh ring Vajasaneyee Samhita. Kantos mangkin para tabib, dukun, balian satata ngarcana Déwi Saraswati mangdané kaswécanin suwaginané dados balian pastika mandi.

Asapunika kaluwihan miwah kaagungan Déwi Saraswati kalintang rumaket ring kauripan manusané ring marcapada. Ring Reg wéda munggah Ida Sang Hyang Saraswati pinaka Beji utawi tukad satata ngicep kemakmuran, kasuburan, gemahripah loh jinawi sané kapuponin manusa pada maka pamipitegep picané sané utama inggih punika kaweruhan, kawicaksanaan miwah kalanguan. Malarapan piodalan Ida Sang Hyang Aji Saraswati Saniscara Umanis Wara Watugunung ngiring tincapang pangubaktiné mangdané Ida tan waneh-waneh ngicén i raga sareng sami kaweruhan, kawicaksanaan, miwah kalengengan. Dumogi.

Artikel Olih: Ida Madé Giur Dipta | Bali Post

Advertisements

Tradisi Ring Bali


Bali pinaka sinalih tunggil pulo ring wewidangan Negara Kepulauan Républik Indonésia sampun kaloktah ring sajebag dura negara antuk kaasrian alam, budaya miwah tradisi. Mayuta-yuta turis lokal miwah dura negara rauh ka Bali nyabran warsa. Daya tarik pesona genah-genah wisatané ring Bali pinaka objék wisata sané nénten wénten telasnyané karauhin, sakadi objék wisata Pantai Kuta, Sanur, Tanah Lot, Bedugul, Kintamani, miwah makudang-kudang lelampahan seni ring Bali. Lianan ring kaasrian alam sané dahat becik, pulau puniki taler katah madué budaya miwah seni tradisi sané tawah. Yéning selehin ring teges krunané, tradisi utawi dresta madué teges pinaka adat sané kamargiang tumurun saking leluhur tur kantun kamargiang olih kramané kantos mangkin.

Wewidangan ring Bali sané kaepah dados makudang-kudang kabupatén gumanti madué seni, tradisi utawi dresta sané dahat mabinayan ring soang-soang kabupatén. Kawéntenan seni tradisi punika pinaka tetamian leluhur sané kantun kalaksanayang olih kramané ring Bali kantos mangkin. Makudang-kudang seni tradisi ring Bali lumrahnyané kalaksanayang ri kala nyanggra utawi nepetin ring pamargi rahinan jagat hindu minakadi, rahina Galungan, Kuningan, Nyepi miwah rahina-rahina lianan.

Wénten makudang-kudang seni budaya miwah tradisi sané tawah, sakadi sané wénten ring Kabupatén Karangasem. Sinalih tunggil seni tradisi sané sampun sering kamargiang ring Bali minakadi tradisi Mekare-kare utawi katah kasambat tradisi Perang Pandan sané kalaksanayang nyabran sasih kalima ring Désa Tenganan, Karangasem. Tradisi Mekare-kare kamargiang pinaka upacara persembahan majeng para leluhur miwah Déwa Indra sané kapercaya pinaka Déwa Perang. Manut nilai historisnyané, kacritayang Déwa Indra mayuda ngalawan Maya Denawa, Raja Bali trah raksasa sakti sané madué bikas kaon sawenang-wenang nambakin krama hinduné ring Bali ngaturang sembah majeng ring Ida Sang Hyang Widi Wasa. Tradisi Mekare-kare kalaksanayang nganggén sanjata sané kekaryanin antuk pandan madui pinaka lambang gada sané kaanggén mayuda. Tradisi punika kalaksanayang olih sakatah krama lanang Désa Tenganan, saking krama sané kantun alit-alit, kantos sané sampun lingsir. Yadiastun para kramané ring sajeroning ngamargiang Mekare-kare punika kantos ngamedalang rah ring anggannyané, nanging kawéntenané punika nénten kantos ngamedalang biyuta ring soang-soang krama. Sesampuné wus maperang, soang-soang krama punika raris saling tulungin nyabutin duin pandan tur nagingin tamba sané kekaryanin antuk kunyit tur daun basé. Lianan ring tradisi Mekare-kare, wénten taler tradisi sané nyihnayang paperangan sané kawastanin Gebug Seraya utawi Gebug Éndé. Sakadi wastannyané, Gebug Éndé kalaksanayang olih sakatah krama ring Désa Seraya Karangasem. Gebug Éndé masrana antuk penyalin salantang 1-2 meter, tur Éndé sané madué teges taméng sané kaanggén pinaka panangkis. Gebug Éndé sané kairingin antuk gamelan puniki kasujatiané nénten wantah pinaka lelampahan kémanten, nanging madué tetujon sané dahat katengetang. Tradisi Gebug Éndé kapercaya olih krama pinaka jalaran anggén nedunang sabeh ri kala lahru. Pateh sakadi tradisi Perang Pandan, krama sané ngamargiang Gebug Éndé taler nénten kantos ngawetuang biyuta sawusan ngamargiang tradisi punika.

Ring wewidangan Dénpasar, wénten tradisi sané kawastanin Oméd-médan. Tradisi Oméd-omédan kalaksanayang olih sakatah yowana ring Banjar Kaja, Sésétan. Yéning selehin ring krunané, oméd-omédan madué teges saling kedeng. Prosési puniki kariin antuk ngamargiang pamuspan sané matetujon nunas karahayuan. Wus punika para yowanané raris kaepah dados kalih, sawetara 50 diri yowana lanang, tur yowana istri. Sesampuné polih arahan, raris kaadu. Barisan sané pinih ajeng saling diman tur katonton sakatah krama. Tradisiné punika kapercaya madué tatujon pinaka panulak baya.

Tradisi sané taler dahat ngulangunin inggih punika tradisi Makotékan sané sampun kamargiang duk masa kerajaan Mengwi. Tradisi puniki kalaksanayang pinaka makélingin kemenangan kerajaan Mengwi daweg mayuda ngalawan Kerajaan Blambangan. Kawastanin tradisi Makotékan santukan kawéntenan suaran kayu sané saling matabrakan ri kala kayu-kayuné punika kasikiang ngawentuk gunung. Kayu sané kagabung punika raris ngawetuang suara ték ték tur raris tradisiné punika kawastanin Makotékan. Makotékan kamargiang olih satusan krama lanang ring Désa Munggu ri kala nepetin rahina Kuningan.

Lianan punika, kantun ring wewidangan Badung, taler wénten tradisi sané kawastanin tradisi Siat Tipat. Siat Tipat pinaka tradisi sané kamargiang olih krama Désa Kapal ri kala sasih kapat. Suksmaning pamargi tradisi puniki, pinaka simbol asal muasal kauripan manusané ring marcepada. Tipat kapercaya pinaka lambang purusa, tur bantal pinaka lambang pradana. Siat Tipat taler matetujon pinaka jalaran ngaturang suksmaning manah olih krama majeng ring Ida Sang Hyang Widhi Wasa antuk waranugraha sané kapaica marupa panén sané melimpah. Prosési puniki kariinin antuk pamuspan sané kamargiang olih para krama ring Désa Kapal tur nganggé sesaji sané katurang marupa tipat tur bantal. Wus punika, sesampuné kaicén arahan olih Ida Jero Mangku raris krama sané sampun kaepah dados kalih kelompok raris saling entungin tipat lan bantal.

Wénten taler tradisi ngentungang jinah sané kawastanin tradisi Masuryak. Tradisi sané kamargiang olih krama ring Désa Bongan, Kabupatén Tabanan punika kalaksanayang nyabran rahina Kuningan. Tetujon pamargin tradisi Masuryak inggih punika pinaka jalaran rasa angayu bagia krama majeng ring Ida Sang Hyang Widhi Wasa antuk paica sané kapolihang olih kramané sami.

Lianan punika, kasujatiané kantun makéh malih tradisi-tradisi sané wénten tun kantun kamargiang olih kramané ring Bali. Yéning selehin malih, sakatah tradisiné punika sujatiné ngamuatang nilai tur tetujon sané dahat mautama ring sajeroning pamarginé. Mawit saking sarana kantos pamarginé madué smerti sané dahat mautama ngastiti ring kasukerthan jagat. Kawéntenane pamargin tradisiné punika taler pinaka cihna krama Baliné sané kantun pageh ngamargiang tradisi tetamian leluhur kantos mangkin. Kawéntenané punika gumanti taler ngawetuang dampak positif majeng i krama indik pelestarian budaya miwah daya tarik pariwisata. Makudang-kudang tradisi punika sapatutnyané mangda tetep kalaksanayang tur kadasarin antuk nilai-nilai sané dahat mautama sumangdané pamargin sakatah tradisi ring Bali prasida ngawinang krama Baliné satata rahayu tur ajeg.

Artikel Saking : Bali Post

%d bloggers like this: